រឿង បុរសខ្វាក់៦នាក់និងសត្វដំរី

កាលពីព្រេងនាយ មានបុរសខ្វាក់ប្រាំមួយនាក់រស់នៅក្នុង​ ខេត្តឥណ្ឌូស្ថាន នៃប្រទេសឥណ្ឌា ។ ថ្ងៃមួយ បុរសទាំង ប្រាំមួយនាក់បាននាំគ្នា ទៅចូលរួមនៅក្នុងពិធីបុណ្យបួងសួង ដល់ព្រះកាណេស (កូនព្រះវិស្ណុ ដែលមានក្បាលជាដំរី) ។ លុះទៅដល់ទី សួនសាធារណៈមួយ បុរសទាំងប្រាំមួយនាក់ បានជួបនឹងហ្មដំរីមួយរូប កំពុងបរដំរីទៅចូលរួម ក្នុងពិធីព្យុះហយាត្រាសត្វដំរី។ ដោយហេតុមិនដែលបានស្គាល់សត្វដំរី បុរសទាំងប្រាំមួយក៏ ស្រែកសុំ ហ្មដំរីព្រមគ្នាថា៖ “បងហ្មដំរី! មេត្តាឲ្យពួកខ្ញុំសុំមើលដំរីបងបន្តិច បានទេ?” ។​  ហ្មដំរីឮហើយក៏ឆ្លើយថា៖ “បាន!ក៏ប៉ុន្តែភ្នែកអ្នកទាំងអស់គ្នា ខ្វាក់អញ្ចឹង មើលម្តេចឃើញ?” ។ ឮដូច្នោះ បុរសខ្វាក់ទាំងប្រាំមួយនាក់ ក៏ឆ្លើយព្រមគ្នាថា៖   “មិនអីទេ ពួកខ្ញុំអាចយកដៃទៅស្ទាប សត្វដំរីនោះ ក៏អាចស្គាល់បានដែរ” ។  “បើអញ្ចឹង” ហ្មដំរីនិយាយបន្ត “សូមអ្នកទាំងអស់គ្នាចូលមកមើលចុះ” ។ ពោលចប់ ហ្មដំរីក៏បរដំរីមកឈរក្បែរ បុរសខ្វាក់ទាំងប្រាំមួយនាក់ ។ បុរសទីមួយដែលចូលមកស្ទាបប៉ះ ត្រង់ប្រមោយដំរី បានលាន់មាត់ថា៖  “អៃយ៉ា! សត្វដំរីមានរាងដូចពស់ហ្ន!” ។  ឮដូច្នោះ បុរសទីពីរដែលស្ទាបប៉ះចំលើភ្លុកដំរី ក៏ឆ្លើយជំទាស់ថា៖  “ទេ ៗ! សត្វដំរីមានរាងដូចលំពែងទេតើ” ។   ឯបុរសទីបីដែលស្ទាបប៉ះត្រង់ស្លឹកត្រចៀកដំរី ក៏ឆ្លើយឡើងថា៖  “អ្នកទាំងពីរខុសហើយ សត្វដំរីមានរាងដូចផ្លឹតទេ” ។   បុរសទីបួនដែលស្ទាបប៉ះជើងដំរីនោះ ក៏និយាយ ថា៖   “មិនមែនទេ! សត្វដំរីមានរាងដូចសសរផ្ទះទេតើ” ។ ​ បុរសទីប្រាំដែលស្ទាបប៉ះត្រង់ដងខ្លួនដំរី ក៏ឆ្លើយកាត់ថា៖  “អ្នកទាំងអស់គ្នាស្ទាបមើល ឃើញខុសស្រឡះ សត្វដំរីមានរាងដូចជញ្ជាំងព្រះវិហារទេ” ។ ឯបុរសទីប្រាំមួយ ដែលបានស្ទាបប៉ះកន្ទុយដំរីនោះក៏និយាយថា៖ “អ្នកទាំងប្រាំនាក់សុទ្ធតែខុសទាំងអស់ សត្វដំរីមិនមែន មានរូបរាងដូចពស់ ដូចលំពែង ដូចផ្លឹត ដូចសសរផ្ទះ ឬក៏ដូចជញ្ជាំងព្រះវិហារ នោះទេ គឺវាមានរាងដូចអំបោស បេះបិត” ។  ឃើញបុរសខ្វាក់ទាំងប្រាំមួយនាក់ ប្រកែកគ្នាយកឈ្នះតែរៀងខ្លួន ហ្មដំរីក៏បានប្រាប់ពួកគាត់ថា៖ “អ្នកទាំងអស់គ្នា  យល់ច្រឡំហើយ សត្វដំរីមិនមែនមានរូបរាងដូចជាពស់ លំពែង ផ្លឹត សសរផ្ទះ ជញ្ជាំងព្រះវិហារ ឬក៏អំបោសនោះទេ វាមានរាងខុសឆ្ងាយពីអ្វីដែលអ្នកទាំងអស់គ្នា បានយល់ឃើញនោះណាស់ ៕  "យើងមិនអាចមើលឃើញ ឬក៏យល់អ្វីៗគ្រប់ជ្រុងជ្រោយឡើយ ដូច្នេះ គប្បីរៀនប្រមូលគំនិតគ្រប់ជ្រុងជ្រោយ មកផ្គុំជារូបភាព អោយធំទូលាយឡើង"